أبراهيم الديب يكتب: المهلة خلصت يا لبيب.. وحق الزمالك ضاع!

- قول لي يا ولا يا حميدة هم الناس في الكفر بيقولوا إيه بعد المهلة اللي اداها أبوك حسين لبيب لكبرات الكورة ما خلصت ولا حس ولا خبر .

- والله يابا محمد الدنيا هايصة وزايطة في الكفر كلاتو بعد ما خلصت المهلة اللي اداها أبويا حسين لبيب اللي ماسك الكل كليلة في النادي الكبير بتاع أبويا الملك فاروق ملك مصر والسودان للقاضي الكبير أبويا عصام عبد الفتاح اللي ماسك القضاة بتوع الكورة كلاتهم في بر مصر بحاله عشان يصنتوا على الكلام المستخبي اللي دار بين شوية القضاة اللي كانوا قاعدين في أوضة المسافرين وبين القاضي بتاع سلافونيا اللي حكم العركة الكبيرة اللي قامت بين الجماعة بتوع النادي بتاع أبويا الملك فاروق ملك مصر والسودان والجماعة بتوع النادي اللي ورا البرج الطويل يوم الأحد اللي فات واللي قال عليها أبويا حسين لبيب إن القاضي بتاع سلافونيا طرمخ على حاجات ياما في العركة الكبيرة ايشي بلنتيات وايشي اجوان زور وضلالية وايشي رفس وايشي ضرب وايشي بلاوي كتيرة عملوها بتوع النادي اللي ورا البرج الطويل خلت بتوع النادي بتاع أبويا الملك فاروق ملك مصر والسودان يولولوا ويجرسوا الدنيا ويقولوا راسنا وألف سيف وحتما ولابد يصنتوا على الكلام اللي دار بين القاضي بتاع سلافونيا وشوية القضاة اللي كانوا قاعدين في أوضة المسافرين عشان يعرفوا من فيهم اللي كان ضلالي وطرمخ على الحاجات الكتيرة اللي خلت بتوع النادي اللي ورا البرج الطويل يبقوا هم اللي هنا وهم اللي هناك .

وسمعت يا ابا محمد إن المهلة اللي اداها أبويا حسين لبيب للقاضي الكبير أبويا عصام عبد الفتاح خلصت ولا حس ولا خبر وما حدش سأل في أبويا حسين لبيب اللي قاعد مستني حد يرد عليه لحدية دي الوقت .

وسمعت كمان يا ابا محمد ان القاضي الكبير أبويا عصام عبد الفتاح لف على المحطات بتاع التلافزيونات كلاتها ولخبط في الكلام وبقى يجيب كلمتين من شرق وكلمتين من غرب وماكانش عارف يقول كلمتين على بعض وزعل زملكاوية الكفر كلاتو اللي قعدوا يحسبنوا عليه ليلتين بحالهم .

وسمعت كمان يا ابا محمد إن أبويا هاني أبو ريدة اللي ماسك الكورة في بر مصر كلاته اطأس وعرف إن القاضي بتاع سلافونيا عمل بلاوي كتيرة في العركة الكبيرة اللي قامت بين الجماعة بتوع النادي بتاع أبويا الملك فاروق ملك مصر والسودان والجماعة بتوع النادي اللي ورا البرج الطويل يوم الأحد اللي فات وسمعت إن أبويا هاني أبو ريدة دق تلفون كبير ياما واتحدت مع القاضي الكبير أبويا عصام عبد الفتاح وقال له بطل كلام ولم لسانك شوية وطرمخ على اللي هببه القاضي بتاع سلافونيا واكفي على الخبر ماجور وكفاية فضايح وجرس عشان احنا مش ناقصين وكفاية علينا الجرس والفضايح اللي فاتت بتاعة أبويا حسام حسن اللي ماسك الفريق بتاع الحكومة .

وسمعت كمان يا ابا محمد إن كبرات النادي بتاع أبويا الملك فاروق ملك مصر والسودان زعلانين ياما من أبويا حسين لبيب اللي مش عارف يجيب حقهم اللي ضايع في كل حتة ولا عارف ياخد حق ولا باطل مع الكبرات اللي ماسكين الكورة في بر مصر كلاته .

وسمعت كمان يا ابا محمد إن ابويا شوبير قال كلام كتير ياما في المحطة بتاعته زعل منه زملكاوية الكفر كلاتو وزعل كمان كبرات النادي بتاع أبويا الملك فاروق ملك مصر والسودان .

وسمعت كمان يا ابا محمد إن زملكاوية الكفر كلاتو واخدين على خاطرهم ياما من أبويا هاني أبو ريدة اللي ماسك الكورة في بر مصر كلاته ومن أبويا القاضي الكبير عصام عبد الفتاح وكمان زعلانين ياما من أبويا حسين لبيب اللي لا بيصد ولا بيرد وزعلانين كمان ياما من أهلاوية الكفر كلاتو اللي مزأططين وفرحانين فيهم وبيتنأوزوا عليهم في الرايحة والجاية وسمعت كمان يا ابا محمد إن سعادة البيه مأمور المركز زعلان ياما من اللي حصل وسمعت إن جناب العمدة ناوي ياخد بخاطر زملكاوية الكفر كلاتو ويعمل صوان كبير أدام الدوار وناوي يعزم سعادة البيه مأمور المركز الزملكاوي وياخد بخاطره هو كمان وناوي يدبح وز وبط وفراخ وحمام لسعادة البيه مأمور المركز وناوي كمان يدبح عجول جاموس ياما ويفرقهم على ناس الكفر كلاته وأمر أبويا سويلم الغفير الخصوصي بتاع جناب العمدة يلف على الكفر كلاتو بيت بيت ويقولهم إن جناب العمدة ناوي يدبح عجول جاموس ياما ويفرقهم على ناس الكفر كلاته وزي بعضه يا أبا محمد خلي الناس تاكل لحمة وتتبسط وكل سنة واحنا طيبين .