إبراهيم الديب يكتب: حسين لبيب فتح المزاد.. لعيبة الزمالك للبيع في الكفر كلاته

- قول لي يا ولا يا حميدة هم أهلاوية الكفر كلاتو بيقولوا إيه لما شافوا أبوك حسين لبيب شغال بيع في اللعيبة بتوع الكورة اللي في نادي الزمالك

- والله يابا محمد الدنيا هايصة وزايطة في الكفر كلاتو دي الناس كلاتها مش أهلاوية الكفر بس بعد ما شافوا أبويا حسين لبيب اللي ماسك الكورة والكل كليلة في نادي الزمالك عمال يبعزأ في اللعيبة بتاعة الكورة يمين وشمال ويودي ده هنا وده هنا ايشي واحد راح عند أبويا محمود الخطيب ببلاش وايشي واحد راح بلد الحجاز وايشي واحد راح عند بتوع أسيوط عند أبويا الشامسي وايشي واحد في بلاد برة بنص التمن وايشي واحد عند الأهلاوية بتوع دبي شكك وبربع التمن وايشي واحد تاني بيقولوا عايزينه في بلد أبويا معمر القذافي وسمعت يا أبا محمد إن أهلاوية الكفر كلاتو فرحانين ياما وشمتانين في زملكاوية الكفر كلاتو وبيقولوا أبويا حسين لبيب ناوي يبيع الفريق كله ويجيب قرشين حلوين يسدد بيهم الوصلات والكمبيالات اللي على النادي ويسدد فواتير الكهربا وفواتير المياه وفواتير الغاز ويقبض المستخدمين بتوع النادي اللي بقالهم زمن ياما ماقبضوش ولا شافوا شكل الفلوس ولا شموا ريحتها

وسمعت يا ابا محمد إن زملكاوية الكفر كلاتو زعلانين ياما من أبويا حسين لبيب اللي عمال يبعزأ في اللعيبة يمين وشمال ولا هو سائل في حد وزعلانين ياما إن أهلاوية الكفر كلاتو بيقولوا إن أبويا حسين لبيب ناوي يجيب ضرفها ويقفل النادي وشغالين نأوزة عليهم في الرايحة والجاية

وسمعت كمان يا ابا محمد إن كبرات النادي في ميت عقبة مش لادد عليهم اللي بيعملوا أبويا حسين لبيب وبيقولوا إنه ناوي كمان يدور وشه على الأرض الجديدة اللي خدها من كبرات الحكومة جنب الهرم الكبير بتاع أبويا خوفو وعايز يبيع حتة منها عشان يفك زنقته

وبيقولوا كمان إن الديون بقت متلتلة فوق دماغه من كبرات الكورة بتوع أبويا فلانتينو اللي ماسك الكورة في الدنيا بحالها

وسمعت يا ابا محمد إن أبويا حسين لبيب هايعمل مزاد قريب على الكام لعيب اللي فاضلين في الفريق بتاع الكورة عشان مش عارف يلاحق على الفواتير والكمبيالات والوصلات اللي على النادي

وسمعت كمان يا ابا محمد إن كبرات الحكومة مديين أبويا حسين لبيب الطرشة ومش سائلين فيه وبيقولوا له لم المصاريف عندك شوية وبلاش بعزأة في القرشين اللي حيلة النادي يمين وشمال ايشي كراسي وايشي شماسي وايشي كربوناتو للحوض الكبير بتاع المياه اللي بيعوموا فيه العيال الصغيرة اللي بيروحوا النادي

وسمعت كمان يا ابا محمد إن زملكاوية الكفر كلاتو حالتهم تصعب على الكافر ومش قادرين يوروا وشهم للأهلاوية بتوع الكفر كلاتو عشان كل مايشوفوهم يتنأوزوا عليهم وراحوا اشتكوا لجناب العمدة

وسمعت كمان يا ابا محمد إن جناب العمدة ناوي ياخد بخاطر زملكاوية الكفر كلاتو ويراضيهم وناوي يعمل صوان كبير أدام الدوار وناوي يعزم سعادة البيه مأمور المركز عشان يحضر وناوي يدبح وز وبط وفراخ وحمام لسعادة البيه مأمور المركز وناوي كمان يدبح عجول جاموس ياما ويفرقهم على ناس الكفر كلاته وأمر أبويا سويلم الغفير الخصوصي بتاع جناب العمدة يلف على الكفر كلاتو بيت بيت ويقولهم إن جناب العمدة ناوي يدبح عجول جاموس ياما ويفرقهم على ناس الكفر كلاته وزي بعضه يا أبا محمد خلي الناس تأكل لحمة وتتبسط وكل سنة واحنا طيبين .