موسى البطران يكتب : بين مزاجية السلة وعشوائية الأهلي.. من يملك كتالوج العقوبات في قضية زهران؟

أزمة عمرو زهران لاعب الأهلي ومنتخب مصر لكرة السلة .. فتحت علينا باب "العشوائية الإدارية" ورسمت علامات إستفهام بالكوم حول المعايير اللي بناءً عليها بتتاخد قرارات الإيقاف والغرامات !

خلينا نكون واضحين من الأول ..المشكلة مش في "قيمة" العقوبة ولا في "مدة" الإيقاف.. المشكلة : هو مين اللي بيحدد العقوبة؟

اتحاد السلة اصدر قرار رسمي بإيقاف زهران 3 شهور وتغريمه 200 ألف جنيه مع إنذار أخير.. بعد واقعة مباراة الأهلي والقناة.

والأهلي كمان قرر يوقع عقوبة مالية تاريخية "على حد وصف مصادره" تأكيدًا منه إن المبادئ "مبتتجزأش " وإن السلوك دا مرفوض جملة وتفصيلاً!

لحد هنا والكلام زي الفل.. أومال الأزمة فين؟

الأزمة إن الأهلي.. وهو بيعاقب لاعبه بأشد عقوبة داخلية في تاريخ الصالات" على حد قولهم " طالع في نفس الوقت بيخبط على طاولة إتحاد السلة وبيسألهم : "هي العقوبة دي جاية من أنهي لائحة بالضبط؟ وهاتوا لنا تقرير الحكم والمواد اللي استندتم عليها!"

وهنا السؤال اللي يفرس أي متابع للرياضة المصرية: هو إحنا كده بنداري الفوضى بالقرارات العنترية والعقوبات المالية التاريخية ؟

قبل ما القرار الرسمي يطلع كان فيه تسريبات إتحاد السلة نفسه بتقول إن اللائحة بتتكلم عن إيقاف مباراتين وغرامة مالية.. وفجأة القرار شطح لـ 3 شهور و200 ألف جنيه!

طبعا انا لا اعترض علي عقوبة اتحاد السلة او اعتبرها لسمح الله مخففه ويمكن قارنتها في مقال سابق بعقوبة لناشئ حدف الكرة في جسم لاعب اتحاد السلة وقفة موسم كامل !

ارجع واقول لو مجلس إدارة اتحاد السلة له حق التشديد أين النص اللائحي ولا القرارات بتتطلع بـ "البركة"

والسؤال التاني برضه يروح لإدارة الأهلي:

انتوا أدنتوا اللاعب وعاقبتوه.. بس هو العقاب الداخلي دا مبني على "توصيف" شكله إيه في لائحة النادي؟ هل دا سلوك غير رياضي؟ ولا فعل مشين؟ ولا مجرد "تكدير إداري" عشان نلم الدور؟

احنا مش بندافع عن زهران ولا بنطالب بتخفيف العقوبة أو تغليظها.. احنا بنطالب بـ "المعيار".

العقوبة ممكن تختلف من حالة للثانية .. ماشي.. بس اللائحة لازم تكون واضحة ومكشوفة للكل قبل ما المخالفة تحصل مش نكتشف بند جديد في اللائحة بعد ما الجريمة تقع!

الشو والـ "فبركة" الإدارية!

كملت الأزمة بغموض لما طلعت نغمة "الأزمة انتهت بالصلح والنفوس إصافت".

وفجأة.. يطلع أحمد جابر لاعب القناة ويفجرها في وش الكل: "محدش كلمني ولا حد إعتذرلي، ولا في صلح حصل أصلاً!"

بل والأدهى إن اللاعب أكد إن نائب رئيس الاتحاد نفسه إعتذر له لأنه صرّح بوجود صلح قبل ما يسمع للطرف المظلوم ونادي القناة متمسك بحقه ومقدم مذكرة رسمية!

مين بقى اللي "افتكس " قصة الصلح دي ونشرها؟ وليه بنحاول نحل القضايا الرياضية بطريقة "القعدة العرفية" بدل ما نطبق اللائحة والقانون؟

كلمة أخيرة..

قضية عمرو زهران تجاوزت حدود ملعب السلة.. القصة بوضوح بتقول إن الرياضة المصرية لسه بتدار بـ "الهواية" وإن اللوائح مجرد حبر على ورق بنشكلها حسب ظروف كل حالة .. وإلى أن يظهر "المعيار الحقيقي"، هيفضل الشارع الرياضي يفقد الثقة في كل قرار بيطلع من إتحاد اللعبة!