إبراهيم الديب يكتب : حميدة يكشف المستور في عركة كريم والقاضي معروف !

قول لي يا ولا يا حميدة هم زملكاوية وأهلاوية الكفر بيقولوا إيه بعد العركة الكبيرة اللي قامت بين كريم ابن أبوك حسن شحاتة والجماعة اللي ماسكين الكورة في بر مصر والجماعة اللي ماسكين الكورة في النادي اللي ورا البرج والفضايح اللي حصلت والكفر كلاته اتكلم عليها .

والله يابا محمد الدنيا هايصة وزايطة في الكفر كلاتو بعد الفضيحة والجرسة الكبيرة اللي حصلت لما كريم ابن أبويا حسن شحاتة فتش السر وجرس الدنيا وبقت فضيحة بجلاجل في بر مصر كله وكمان هنا في الكفر كلاتو

وسمعت يا ابا محمد إن كريم ابن أبويا حسن شحاتة اللي طول عمره مابيتكلمش عن حاجة خالص تزعل أبويا محمود الخطيب كبير العيلة ولا تزعل أهلاوية الكفر كلاتو فاض بيه على الآخر

وقال لا ممكن أبدأ أسكت على اللي حصل بين القاضي محمد معروف ووائل جمعة اللي بسم الله ماشاء الله بقى مدير أد الدنيا ولازما ولابد أفتش السر وأقول القاضي معروف كان بيوشوش المدير جمعة وبيقوله إيه وسمعت يا ابا محمد إن القاضي معروف قال كلام ماكانش يصح يقوله للمدير جمعة

وسمعت إن قال له خلي الولا علي محمود يختشي على دمه شوية ويبطل تنطيط على النجيلة والا هايسفخه قلمين على وشه عشان خلى الناس كلاتها كلت وشه وخصوصي اللي قاعدين أدام التلافزيون

وقال له كمان ياريت تزيحه من أدامي عشان شكله عيل عبيط وهايودينا في داهية ويخلي زملكاوية الكفر كلاتو يتنأوزوا علينا ويشمتوا فينا

وسمعت كمان يا ابا محمد إن المدير جمعة قال للقاضي معروف كتر خيرك ومعلش هو عيل عبيط والجميل ده مش هاننساه لك أبدا والكل في النادي وأولهم أبويا محمود الخطيب كبير العيلة هايتبسطوا منك ياما

وسمعت يا ابا محمد إن الدنيا قامت وماسكتتش على كريم ابن أبويا حسن شحاتة انه كيف يفتش السر ويجرس الدنيا ويفضح القاضي معروف والمدير جمعة وهاتك يا كلام وزعيق ايشي كلام من أبويا شوبير في المحطة بتاعته وايشي كلام من أبويا القاضي الكبير عصام عبد الفتاح اللي ماسك القضاة بتوع الكورة كلاتهم وايشي كلام من أهلاوية الكفر كلاتو وايشي كلام في التلافزيونات كلاتها وكلهم راسهم وألف سيف يقولوا لازما وحتما كريم ابن أبويا حسن شحاتة يقول إن الكلام ده كله ما حصلش وان القاضي معروف والمدير جمعة كانوا بيوشوشوا بعض على حاجة تانية وما ينفعش كريم ابن أبويا حسن شحاتة يتحشر بيناتهم وسمعت إن الجماعة في البيت الكبير اللي ماسكين الكورة في بر مصر كلاته زعلانين ياما من كريم ابن أبويا حسن شحاتة

وسمعت إن أبويا هاني أبو ريدة كبير العيلة هناك واخد على خاطره يا ما وقال لازما وحتما القاضي معروف يقول كان بيوشوش المدير جمعة وبيقوله إيه بعد ما جاله خبر إن كلام كريم ابن أبويا حسن شحاتة طلع بصحيح وسمعت إن ناس من كبرات الحكومة جالهم كمان خبر بكده وقالوا لأبويا هاني أبو ريدة طرمخ على الحكاية واكفي على الخبر ماجور وكفاية جرس وفضايح وقولوا إن احتا هانكفي على الخبر ماجور عشان خاطر أبويا حسن شحاتة ومش هانشتكي ابنه ويا دار ما دخلك شر

وسمعت كمان يا ابا محمد إن أبويا هاني أبو ريدة قال للقاضي معروف لم نفسك واكسف على دمك وداري خيبتك وقول أنا كمان مش هاشتكي كريم عشان خاطر أبويا حسن شحاتة

وسمعت كمان إن أهلاوية الكفر كلاتو مقموصبن ياما من زملكاوية الكفر كلاتو وزعلانين بزيادة واشتكوا لجناب العمدة وقالوا له مايرضيكشي زملكاوية الكفر كلاتو يتنأوزوا علينا في الرايحة والجاية ويجرسونا عشان اللي حصل بين القاضي معروف والمدير جمعة

وسمعت إن جناب العمدة ناوي ياخد بخاطر الأهلاوية بتوع الكفر كلاتو ويراضيهم وهايعمل لهم صوان كبير أدام الدوار وناوي يعمل عزومة كبيرة ياما وسمعت كمان إن جناب العمدة ناوي يعزم سعادة البيه مأمور المركز عشان ييجي هو كمان ياخد بخاطر الأهلاوية بتوع الكفر كلاتو ويراضيهم

وسمعت كمان إن جناب العمدة ناوي يدبح وز وبط وفراخ وحمام لسعادة البيه مأمور المركز وناوي كمان يدبح عجول جاموس ياما ويفرقهم على ناس الكفر كلاته وأمر أبويا سويلم الغفير الخصوصي بتاع جناب العمدة يلف على الكفر كلاتو بيت بيت ويقولهم إن جناب العمدة ناوي يدبح عجول جاموس ياما ويفرقهم على ناس الكفر كلاته وزي بعضه يا أبا محمد خلي الناس تاكل لحمة وتتبسط وكل سنة واحنا طيبين .