إبراهيم الديب يكتب : عويجة افندي والبند الجزائي في عقد شوبير
- خير يا عويجة افندي إيه الملف ده كله وبتاع إيه وإيه الأوراق دي كلها .
- ده ملف تجديد عقود اللعيبة يا افندم .
- هاااااا وعملتوا ايه معاهم ومين جدد ومين لسه .
- والله يا افندم احنا تعبنا أوي مع اللعيبة كلها ومفيش واحد فيهم راضي ياخد أقل من التاني وكلهم بيقولوا لنا يا ناخد زي الولا زيزو يا نمشي هو مش أحسن مننا .
- وعملتوا إيه يا عويجة افندي.
- شكلنا لجنة يا افندم لحصر عدد اللعيبة اللي مفروض يجددوا عقودهم.
' - هاااااا وبعدين عرفتوا عددهم.
- اطمن يا افندم اللجنة شكلت لجنة تانية عشان تتأكد الأول مين هايجدد ومين لا .
- وعملت إيه اللجنة التانية .
- اللجنة التانية انبثق منها لجنة جديدة .
- الللللاه لجنة تاني .
- أيوة يا افندم عشان اللجنة الجديدة تشوف مين منهم هايجدد بشروطنا احنا.
- هاااااا وبعدين حد منهم جدد .
- أيوة يا افندم الولا إمام عاشور جدد بعد ما نشف ريقنا.
- وجدد بشروطنا احنا
- لا للأسف يا افندم .
- وللأسف ليه انتوا مش قولتولوا يا تجدد بشروطنا يا مفيش تجديد .
- للأسف يا افندم الولا ركب دماغه وراسه وألف سيف يجدد بشروطه هو وياخد أكتر من الولا زيزو والا يمشي ويحترف برة .
- وطبعا قولتولوا انت حر ولو عايز تمشي امشي .
- لا للأسف يا افندم ما عملناش كده خفنا أحسن الولاه يرجع الزمالك ويشتمنا تاني
- وعملتوا إيه .
- شكلنا لجنة يا افندم عشان تشوف طلبات الولا وشروطه اللي صمم عليها .
- وعملت إيه اللجنة .
- اللجنة بعتت تقرير للإدارة موصي عليه بعلم الوصول إنها مضطرة توافق على شروط الولا.
- وجبتوا فلوسه منين يا عويجة افندي .
- اطمن يا افندم ماتنساش إن احنا مدكنين قرشين حلوين في البوسطة خدنا منهم عكمة حلوة واديناهم للولا .
- والولا ابن شوبير عملتوا ايه معاه يا عويجة افندي .
- الولا ده بالذات يا افندم نشف ريقنا على الآخر أكتر من الولا إمام .
- ليه يا عويجة افندي وابوه كان فين من ده كله .
- للأسف يا افندم أبوه هو كمان نشف ريقنا أكتر من ابنه.
- ليه عمل إيه أبوه .
- خد إجازة من شغله وقعد رايح جاي علينا وراسه وألف سيف ابنه لازم ياخد زي الولا زيزو والولا إمام وكمان يكتب شرط جزائي في العقد .
- وشرط إيه ده اللي عايزه أبوه.
- أبوه قال لنا إن ابنه مفيش منه اتنين دي الوقت في مصر كلها ولو جاله عقد احتراف لازم تسيبوه يمشي يلقط رزقه برة وصمم على الشرط الجزائي.
- وبعدين عملتوا ايه يا عويجة افندي .
- اطمن يا افندم أنا ما سيبتوش وشكلت لجنة عشان تتعرف على الشرط الجزائي اللي طلبه شوبير الكبير لابنه.
- هاااااا وبعدين .
'- اللجنة شكلت لجنة تانية عشان تفحص الشرط الجزائي حاكم أنا صاحي له أوي يا افندم .
- وعملت إيه اللجنة التانية .
- اللجنة التانية انبثق منها لجنة جديدة عشان تشوف جدية الشرط الجزائي .
- اللللللللاه لجنة تاني .
- أيوة يا افندم احنا لقينا الولا وأبوه مصممين على الشرط الجزائي وراسهم وألف سيف يكتبوه في العقد .
- هاااااا وعملتوا ايه أكيد رفضتوا الشرط الجزائي .
- لا يا افندم للأسف
بس اطمن وحط في بطنك بطيخة صيفي أنا صاحي لهم ومفتح عينيا ووداني أوي ياافندم .
- هاااااا وإيه اللي حصل .
- شكلت لجنة لتغيير المسمى .
' - لجنة تااااااني ومسمي إيه اللي هاتغيره .
- كلفت اللجنة تشكل لجنة تانية عشان تشوف مسمى تاني للشرط الجزائي واللجنة التانية قدمت اقتراح مهم أوي يا افندم.
- اقتراح إيه.
' - اللجنة قالت بدل ما نكتب في العقد شرط جزائي نكتب بداله بند جزائي .
- وإيه الفرق بين ده وده .
- طول بالك شوية يا افندم اللجنة التانية انبثق منها لجنة جديدة عشان تفرق بين الشرط الجزائي والبند الجزائي .
- هاااااا وعملت إيه اللجنة الجديدة .
- اللجنة قالت يا افندم البند الجزائي هو هو الشرط الجزائي بس نصمم نكتب في العقد بند جزائي عشان الولا وأبوه مايمشوش كلامهم علينا .
- يعني الولا جدد ولا لسه .
- جدد يا افندم .
- جدد بشروطنا طبعا وبالبند الجزائي و من غير شرط جزائي وبالفلوس اللي قلنا عليها .
- لا للأسف يا افندم جدد بشروطه هو وبالشرط الجزائي وبالفلوس اللي قال أبوه عليها.
- الللللاه وجبتوا الفلوس دي كلها منين .
- اطمن يا افندم فلوسنا في البوسطة كتير وماتشيلش هم .
- عويجة افندي انت مفيش زيك اتنين هنا في المصلحة .
- ربنا يخليك لينا يا افندم .
- عويجة افندي انت متحول للتحقيق ومعاك ألاضيش اللجان كلهم .
موضوعات ذات صلة
