موسى البطران يكتب: الزمالك بيكسب بحبة البركة!.. ومش كل مرة تسلم الجرة !

أنا شخصيًا خايف على الزمالك.. وقلبي مش مطمن!

عارف إن الكلام ده ممكن يزعل بعض الزملكاوية .. خصوصًا إن الفريق فاز في مباراته الأخيرة على منتخب السويس بتروجت 2/1.. ورفع رصيده إلى 7 نقاط من 9 نقاط بعد أول 3 جولات من بطولة الدوري.

لكن خليني أكون صريح معاكم..

هو اللي حصل في مباراة السويس بتروجت ممكن يتكرر تاني؟

عارف.. حتقولوا لي: "دي كرة القدم.. واللي بيكسب هو اللي يستحق"

وأنا معاكم.. الفوز هو الأهم في النهاية.

لكن..مش كل مرة تسلم الجرة!

اللي شاف مباراة الزمالك والسويس بتروجت .. خصوصًا بدايتها.. يعرف إن الأمور كان ممكن تتعقد جدًا.

الفريق المنافس ضغط ووصل لمرمى الزمالك كتير .. والعارضة وقفت أكثر من مرة بجانب الزمالك والمهدي سليمان شال بلاوي في توقيتات مهمة.

يعني ببساطة.. الزمالك كان ممكن يدخل مرماه 3 أهداف في العشرين دقيقة الاولي !.

والحكاية مش مجرد انطباع شخصي

الأرقام نفسها بتقول كده !

بحسب موقع FotMob العالمي .. بلغت الأهداف المتوقعة ضد الزمالك في أول 3 جولات 5.4 هدف، بينما استقبل الفريق فعليًا هدفًا واحدًا فقط.

يعني إيه الكلام ده؟

يعني إن مرمى الزمالك تعرض لفرص خطيرة كان من الممكن أن تسفر عن أكثر من 5 أهداف، لكن الواقع إن الفريق لم يستقبل سوى هدف واحد!

وهنا لازم نقف ونسأل: إلى متى؟

هل ممكن الزمالك يفضل كل مباراة يخرج منها بالنتيجة رغم هذا الكم من الخطورة على مرماه؟

هل كل مرة العارضة هتنقذ؟

هل كل مرة المهدي سليمان هيتألق؟

هل كل مرة المنافس هيهدر؟

أكييد لأ..

ومش كل مرة تسلم الجرة!

الزمالك .."مالوش كتالوج " !!

الغريب إن الزمالك فعلًا "مالوش كتالوج"

في مباراة البنك الأهلي .. قدم الفريق شوطًا ثانيًا رائعًا وسجل خلاله 3 أهداف .. فكلنا قلنا: خلاص.. الزمالك بدأ يدخل فورمة البطولة.

وقلنا إن الفريق حيكسر الدنيا في المباراة اللي بعدها.

لكن أمام السويس بتروجت .. وجدنا أنفسنا أمام مباراة مختلفة تمامًا.

في الوقت الذي كان فيه المنافس يضغط ويحاصر الزمالك .. ظهر فجأة حسام أشرف وسجل برأسه هدفًا منح الفريق الأفضلية.

ثم ظهر الموهوب محمد السيد في الشوط الثاني .. واستغل فرصة رائعة وسجل الهدف الثاني.

يعني حتى في أصعب أوقات المباراة.. الزمالك عنده لاعيبة قادرة تنور النفق المظلم.

ودي نقطة إيجابية جدًا.

لكن المشكلة إننا لا نستطيع أن نبني موسمًا كاملًا على انتظار "لحظة الإنقاذ".

أنا لا أنتقد معتمد جمال.. أنا أتكلم عن الواقع!

ولما أقول إن عند الزمالك مشاكل.. أنا مش بانتقد اللاعبين ولا بقلل من مجهود الجهاز الفني بقيادة ابن الزمالك الوفي معتمد جمال.

بالعكس..

أنا بتكلم عن واقع صعب جدًا.

فريق بدأ موسمًا طويلًا من غير فترة إعداد حقيقية ..ومن غير عدد كافٍ من المباريات التجريبية.

فريق لا تتاح له فرصة تدعيم صفوفه بالشكل الذي تفعله فرق أخرى.

فريق تعرض لغيابات مؤثرة .. ومشكلة البرازيلي بيزيرا ..ورحيل حسام عبدالمجيد .. أحد العناصر المهمة في الخط الخلفي.

وفي نفس الوقت مطلوب من الزمالك أن ينافس الأهلي وبيراميدز.. وهما يملكان إمكانيات مادية وفنية أكبر بكثير.

طيب.. إزاي؟

دي هي المعادلة الصعبة التي تواجه الزمالك.

والأصعب منها أن الموسم مش دوري وبس.

قدام الزمالك دوري أبطال أفريقيا وكأس السوبر وكأس مصر، وكأس العاصمة.. يعني مشوار طويل جدًا، ومباريات وضغوط وإصابات وإيقافات.

وهنا السؤال:

الزمالك حيلاحق على كل البطولات دي إزاي إذا استمر بنفس الطريقة؟

7 نقاط.. لكن جرس الإنذار موجود

أنا مش عايز أظلم الزمالك.

الفريق حصل على 7 نقاط من أول 3 مباريات.

تعادل مرة وفاز مرتين.

وده في حد ذاته بداية جيدة جدًا من ناحية النتائج.

لكن كرة القدم مش نتائج فقط.. خصوصًا لما تكون بتبني فريقًا ينافس على بطولات كثيرة.

والأرقام تقول إن هناك مشكلة دفاعية تحتاج إلى علاج سريع.

لأن الفرق الكبيرة مش المفروض تستنى الحظ ينقذها

الفرق الكبيرة هي اللي بتفرض شخصيتها على المباراة.. مش تستنى المباراة ترحمها!

وأنا عندي ثقة إن الزمالك عنده لاعيبة ممكن تعمل الفارق

حسام أشرف.. محمد السيد.. وغيرهم.

لكن هؤلاء اللاعبين يحتاجون إلى الوقت والخبرة والاستقرار.

وفي نفس الوقت .. يحتاج الفريق كله إلى تطوير المنظومة الدفاعية وتقليل المساحات والفرص التي يحصل عليها المنافس.

لأن اللي حصل في أول 3 مباريات ممكن يعدي..

لكن لو استمر بنفس الصورة .. أمام منافسين أقوى .. وفي بطولات أكبر..

ساعتها «حبة البركة» مش حتكفي!

والزمالك يا جماعة.

مش كل مرة تسلم الجرة!