موسى البطران يكتب : هل الاهلي محتاج تدخل الفار والحكام علشان يكسب ؟!
هل الاهلي محتاج تدخل صريح وصارخ من الحكام وتقنية " الفار" علشان يكسب بالعافية ؟
المنطق بيقول : لأ مش لازم خالص .. الفريق ماشاءالله عنده كل الإمكانيات الفنية والمادية .. يعني خد عندك 80% من قوام المنتخب في الاهلي ومش كده وبس لعيبة محترفين مدفوع فيهم فلوس "بالهبل " .. طيب ايه المشكلة ؟
المشكلة يا مؤمن ان كل "التكويش " ده كله في اللعيبه مايعملش فريق جماعي .. اللي بيقولو عليه " تيم ورك " يعني فريق بلا روح .. كل واحد عايز يكون هو النجم الأوحد!
هو ده حال فريق الاهلي !
طيب والحل أيه ؟
مفيش غير التدخل الجراحي ..أقصد نفحات الحكام وبركات سيدي " الفار" .. همه دول الحل!
إدارة النادي الاهلي كان عندهم بعد نظر وعرفين ان العيبة ديه مش "حتستر" مهما جابوا مدربين .. عندك المغربي حسين عموته جه ولحد دلوقتي مشفناش منه حاجه !
تقوم تعمل أيه الادارة ؟.. تضرب "كرسي في الكلوب " .. وقبل الهنا بسنة يعني قبل الدوري ما يبدأ .. تذبح القطة للجنة الحكام اللي لسه ماسكة يدوب من يومين .. ببيانات تحذيرية نارية وهات يا تقطيع .. طبعا اللجنة خافت ومفيش أدمها حاجة تعملها ياولداه .. غير انها تخاف وتموت في جلدها .. وتسيب فريق الاهلي في حالة .. لا تحسب عليه لا فاولات ولا ضربات جزاء ومش بس كدة .. تخلي " الفار " في اجازة مفتوحة !
هو ده اللي حصل للاهلي في أول مباراة مع الشرقية إنبي اللي كان متقدم بهدفين في أول 20 دقيقية وبقدرة قادر الاهلي طلع فايز 3 / 2 إزاي هو كده وإن كان مش عاجبك أضرب رأسك في الحيطة !
نوقف علي كده لا والف لا في المباراة التانية مع زد بيتكرر نفس السيناريو ولكن بقي بشكل مختلف ..
ضربة جزاء واضحة وضوح الشمس.. الكرة لمست أيد أشرف بن شرقي يقوم الفار بعد تمحيص دقيق يقول لأ .. صحيح لمست إيده لكن في المسموح يعني ياباشا هو كده !
هجمة للاهلي بعد فاول واضح من لاعب الاهلي الحكم "طنش " مش مشكلة توصل الكورة لمنطقة جزاء زد .. حامل الراية اللي هو مساعد الحكم واللي ملوش شغلانه غير يكتشف "الاوفسايد " .. رفع الراية ياولداه الراية علشان يقول ان اللعبة تسلل .. يقوم عمك سيدي "الفار" يقوله إسكت "يله " مفيش أوفسايد أنت ما بتشفش .. وبعد ما كان الهدف ملغي تيجي الاوامر من سيدك الفار ويتحسب جون للاهلي!
هنا بقى السؤال الذي يهمني ويهم كل االناس :ليه الجماهير وهي بتشاهد المباريات ..تبحث أولًا عن قرار الحكم والـ VAR قبل ما تبحث عن أداء اللاعبين؟!
هل المشكلة في الحكام .. ولا في لجنة الحكام؟ ولا الضغط الإعلامي والجماهيري؟ ولا في طريقة إدارة المباريات؟
وهل فيه أندية تعرف تضغط، وأندية أخرى ما بتعرفش ؟!
والسؤال الأخير:هل يستمر غياب العدالة التحكيمية؟ وإلى متى؟
ومن ينقذ عدالة الملاعب من الانقراض؟!
موضوعات ذات صلة
