موسى البطران يكتب: محمد بركات فضح الأهلي.. والإعلام بيتكلم عن المعجزة!
هو أيه اللي بيحصل بالظبط ؟
بصراحة.. أنا مش فاهم ومستغرب جدًا من الطريقة اللي إتعامل بيها الإعلام الرياضي فى تغطيته لاحداث مباراة الأهلي والشرقية أنبي واللي انتهت بفوز صعب جدا لصالح الاهلي 3/2 بعد ما كان خسران 2 /0 !
كل المعلقين والنقاد والمحللين بتوع البتنجان كانوا كلهم بيتكلم في حاجه واحده بس !
الأهلي عمل المعجزة.. الأهلي حقق المستحيل.. الأهلي رجع من الموت.. الأهلي أثبت إنه فريق لا يعرف الاستسلام!
أيه ياخونا هو الاهلي عمل ايه بالظبط .. هو لامؤاخذه كان بيلعب ريال مدريد؟ ولا مانشستر سيتي؟ واحنا مش عارفين !
ياعالم .. الأهلي كان بيلعب الشرقية أنبي .. عارفين يعني أيه .. فريق لعيبته كلها علي بعض كده .. قيمتهم السوقية متجيش بقيمة عقد واحد من عقود لعيبة الاهلي بتوع الملايين !
أنا عايز أسأل سؤال .. أسال ولا بلاش : هو إزاي الأهلي عمل المعجزة اللي بتقولوا عليها ؟
يعني أيه فريق إمكانياته الفنية والمادية متواضعة قدر يحبس انفاس الأهلي وجماهيرة حتي الدقيقة 90 !
مش حتكلم عن ضربة الجزاء اللي احتسبها الحكم محمود ناجي واللي الكل قال عنها انها من وحي الخيال مش مشكلتنا دلوقتي .. لكن خلوني اكلمكم عن مين هو اللي حبس انفاس الاهلي ؟
عارفين مين ؟ شاب اسمه محمد بركات.
وقبل ما حد يفتكر إنني أقصد محمد بركات نجم الأهلي والمنتخب السابق اقولكم : لا يا جماعة.. ده محمد بركات واحد تاني!
شاب مصري عمره 34 سنة .. لا كان نجم كورة مشهور ..ولا لاعب دولي ..ولا عنده تاريخ كروي يخلي اسمه يفتح له كل الأبواب.
شاب زي ملايين من شباب المصريين اللي حبوا الكورة .. وقرروا يدرسوها صح .. ويفهموا تفاصيلها .. ويتعلموا التدريب الحديث .. وادارة الشرقية انبي اقنعوا بيه وأدوله فرصة التدريب
الشاب ده وقف قدام حسين عموتة!
عموتة صاحب الاسم الكبير.. والخبرة الطويلة .. والسنين اللي قضاها في الملاعب .. ودرب فرق ومنتخبات .. واشتغل في أعلى مستويات الكرة.
محمد بركات قدر يتفوق علي عموته تخيل وفي 20 دقيقة بس فريقه سجل هدفين وكان عنده فرصه يسجل هدف ثالث من ضربة جزاء صحيحة مش من وحي الخيال !
القصة مش إن الأهلي كسب في الدقيقة الاخيرة ..القصة إن فيه مدرب شاب مصري .. بإمكانيات محدودة .. قدر يخلي فريقه يواجه الأهلي بندية وثقة وشخصية.
محمد بركات هو من "فضح " الأهلي ..أكثر مما صنعت "ريمونتادا " الأهلي بطولة إعلامية زائفة !
موضوعات ذات صلة
