إبراهيم الديب يكتب : حميدة .. وحكاية حريم حسام حسن

قول لي يا ولا يا حميدة : هم الناس في الكفر كلاته بيقولوا إيه بعد العركة الكبيرة اللي قامت في حوض الميه الكبير اللي بيقولوا عليه الساحل بين الحريم بتوع أبوك حسام حسن اللي ماسك الفريق بتاع الحكومة .

والله يابا محمد الدنيا هايصة وزايطة في الكفر كلاتو بعد الخيبة التقيلة والجرسة والفضايح اللي حصلت في حوض الميه الكبير اللي بيقولوا عليه الساحل بين الحريم بتوع أبويا حسام حسن اللي ماسك الفريق بتاع الحكومة

وسمعت يا ابا محمد إن زملكاوية الكفر كلاتو بيتمسخروا علي أبويا حسام وعلى أبويا أبو ريدة اللي ماسك الكورة في بر مصر كله

وشمتانين في أهلاوية الكفر كلاتو اللي كانوا واقفين سند وضهر لأبويا حسام اليومين اللي فاتوا

وسمعت إن زملكاوية الكفر كلاتو بيقولوا لازم أبويا أبو ريدة ياخد موقف ويقول لأبويا حسام كتر خيرك لحد كده

ومع السلامة بعد ما فضحتنا انت وحريمك في حوض الميه الكبير وجرستونا وخليتوا اللي يسوى واللي مايسواش يشمت فينا

وخليتوا زملكاوية الكفر كلاتو يتنأوزوا علينا في الرايحة والجاية.

وسمعت يا أبا محمد إن أبويا حسام أغمن عليه لما حريمه مسكوا في بعض أدامه لا خشى ولا آنون ولا عملوا حساب لأبويا حسام ومسكوا في شعور بعض وهات ياتقطيع وكل واحدة من دول نازلة في التانية ضرب وشتيمة

وفي الاخر لما لقوا أبويا حسام وقع في الأرض جريوا عليه عشان يفوقوه وفيه واحدة منهم جريت جابت فحل بصل وشممتهوله والتانية جابت ازازة ريحة ورشتها كلها على وشه

والحمد لله أبويا حسام فاق وبقى مليح.

- وابوك أبو ريدة عمل إيه بعد ده كله ياولا ؟ -

- سمعت يا ابا محمد ان ناس ياما قالوا لازما وحتما أبويا أبو ريدة يقول لأبويا حسام كتر خيرك على كده وكفاياك فضايح وجرس ومع السلامة وشوف لك حتة كن فيها وماتظهرش وراسهم وألف سيف يكلموا كبرات الحكومة ويبلغوهم باللي حصل من أبويا حسام وحريمه ويقولوا لهم إن أبويا حسام جاب سمعتنا في الوحل والطين هو وحريمه

وسمعت كمان يا ابا محمد إن ابويا ابو ريدة ناوي مايسمعش كلام زملكاوية الكفر وناوي يقعد أبويا حسام بالعند فيهم وسمعت كمان يا ابا محمد إن زملكاوية الكفر كلاتو زودوها حبتين مع أهلاوية الكفر كلاتو في النأوزة عليهم وعشان كده سمعت إن جناب العمدة ناوي ياخد بخاطر الأهلاوية بتوع الكفر كلاتو ويراضيهم وهايعمل لهم صوان كبير أدام الدوار وناوي يعمل عزومة كبيرة ياما

وسمعت كمان إن جناب العمدة ناوي يعزم سعادة البيه مأمور المركز وناوي يدبح له وز وفراخ وبط وحمام وناوي كمان يدبح عجول جاموس ياما وأمر أبويا سويلم الغفير الخصوصي بتاع جناب العمدة يلف على الكفر كلاتو بيت بيت ويقولهم إن جناب العمدة ناوي يدبح عجول جاموس ياما ويفرقهم على ناس الكفر كلاته وزي بعضه يا أبا محمد خلي الناس تاكل لحمة وتتبسط وكل سنة واحنا طيبين .ِ