موسى البطران يكتب : كل شيء إنكشفن وبان .. الحقيقة الكاملة لأزمة إمام عاشور في الأهلي

قلناها من فترة وناس كتير زعلت منا .. قلنا إن إمام عاشور "بره الأهلي" ولما رمينا الكلمة دي رميناها بالدليل والمنطق وقراءة الموقف صح !.. بس ما علينا المشهد أهو بيشرح نفسه!

أول ما البعثة طارت خرجت علينا "عاصفة" اتهامات بالتأليف والتعصب : أهو إمام مسافر مع الأهلي إسبانيا عشان يلعب مع برشلونة!".. والأطقم التانية تقولك: "يا عم ده كل اللعيبة جددت.. شوبير وياسر إبراهيم وغيرهم ومفيش أي مشكلة!".. ماشي يا معلم!

ودارت الأيام .. ولا حد جدد وكل لاعب حاطط شروطه .. وعلى رأي الفنان الراحل عبد المنعم مدبولي في مسرحية ريا وسكينة : " كل شيء إنكشفن وبان" !

الجماعة إياهم اللي كانوا بهيصوا في الزيطة مبقوش عارفين يداروا أكتر من كده على اللي بيحصل في معسكر إسبانيا:

إمام عاشور من يوم ما حط رجله هناك ما دخلش تدريب جماعي واحد مقضيها "تراك" ورياضة فردية وما لعبش ولا دقيقة ودية!

والسر؟ مش إجهاد.. السر في اللفتة المادية:

عاوز يصرف الـ 25% بتاعة الموسم الجديد على العقد القديم.

عاوز يجدد بـ 25 مليون جنيه كاش و15 مليون إعلانات و10 مليون مميزات فوقيهم 10 مليون مكافأة توقيع " اه والله زي ما بقولك كده "

يا إما يلم شنطه ويتكل على " كونيا سبور" التركي اللي عارضين عليه 2.5 مليون دولار راتب سنوي!

اللي كانوا بيكدبوا كلامنا همه همه اللي بيأكدوا كلامنا دلوقتي إن إمام ما اتمرنش تمرينة واحدة كاملة.. أصل إصابته مش في الخلفية ولا في الضامة .. لكن إصابته في "عضلة الفلوس"!