إبراهيم الديب يكتب : عويضة أفندي وتجديد إمام !
- ها يا عويجة افندي الولاه إمام عاشور جدد عقده ولا لسه .
- لا لسه يا افندم .
- وما جددش ليه لحد الوقت.
- ما تقلقش يا افندم احنا مصممين الولاه يجدد عقده مهما يحصل وصاحيين أوي للوكيل بتاعه اللي كل شوية يطلع يقولنا انتوا نادي ما بيحترمش كلمته عشان جات عروض احتراف كتير للولاه وانتوا سحبتوا كلامكوا بعد ما وعدتوه بالاحتراف .
- وحصل إيه يا عويجة أفندي .
- يا افندم الوكيل بتاعه بيقول إنه عنده كام عقد احتراف للولاه إمام واحنا مش مصدقين حكم الوكيل ده كلامه كتير وألاعيبه أكتر
- وعملتوا إيه يا عويجة افندي .
- شكلنا لجنة يا افندم عشان تبحث العروض اللي بيقول عليها الوكيل الألعوبان ده .
- واللجنة عملت إيه .
- اللجنة شكلت لجنة جديدة عشان تشوف جدية العروض.
- ها وعملت إيه اللجنة الجديدة .
- اللجنة الجديدة انبثق عنها لجنة تانية عشان تشوف العروض جاية منين.
- ها وبعدين يا عويجة افندي .
- اللجنة التانية شكلت لجنة ثالثة عشان تشوف كام عرض وصلوا النادي.
- لجنة تااااااني يا عويجة افندي .
- أيوة يا افندم ما احنا لازم نكون مصحصحين أوي للوكيل الألعوبان .
- وعرفتوا كام عرض وصلوا للنادي.
- لا يا افندم .
- ولأ ليه يا عويجة افندي .
- الوكيل الألعوبان اللي اسمه على اسم أبونا آدم وبيقول إنه وطني وهو لا وطني ولا حاجة بيمطوح فينا مرة يقولنا ٥ عروض ومرة يقولنا ٣ عروض بس اطمن يا افندم احنا صاحيين له أوي وشكلنا لجنة مصغرة للكشف عن عدد العروض الحقيقي.
- اللاااه لجنة تاااااني يا عويجة افندي .
- أيوة يا افندم ما هى اللجنة دي اكتشفت إن الوكيل الألعوبان عايز يودي الولاه نادي تعبان وشكله كده عايز يعمل لنا كوبري عشان الولاه يرجع الزمالك تاني .
- الللللاااه كوبري إيه يا عويجة افندي هى دي مش شغلتنا احنا.
' لا يا افندم ما احنا لازم نكون صاحيين ومفتحين أحسن الولاه يروح الزمالك ويشتمنا تاني زي ما عمل قبل كده.
' - وهو الزمالك معاه فلوس عشان يشتري لعيبة دول مفلسين يا عويجة افندي .
- لا يا افندم ما انا اطقست وعرفت انهم بيعملوا جمعية كبيرة أوي يمكن تعدي ٢ نفر وهايقبضوها الأول عشان يشتروا الولاه .
- وبعدين ناويين على إيه يا عويجة افندي.
- اطمن يا افندم احنا عاملين حسابنا في قرشين كويسين هانسحبهم من البوسطة ونديهم للولاه عشان يجدد عقده.
- ربنا يقويكوا يا عويجة افندي ونسمع خبر حلو ونخلص بقى من الشغلانة دي .
- اطمن يا افندم حط في بطنك بطيخة صيفي وروح البيت وشغل المروحة ورحرح كده وماتشيلش هم .
موضوعات ذات صلة
