إبراهيم الديب يكتب : حميدة في أرض أكتوبر

- قول لي يا ولا يا حميدة هم أهلاوية الكفر كلاتو بيقولوا إيه بعد الحكومة ما خدت أرض الزمالك اللي كانوا هايعملوها نادي يامة الهرم بتاع جدنا الكبير خوفو الله يرحمه وهم بصحيح فرحانين ومزأططين وياترى حال سعادة البيه مأمور المركز ايه دي الوقت ياولا .

- والله يابا محمد الدنيا هايصة وزايطة في الكفر كلاتو بعدما كبرات الحكومة قالوا راسنا وألف سيف لاممكن أبدا بتوع الزمالك يعملوا نادي تاني يامة الهرم بتاع جدنا الكبير خوفو الله يرحمه والاهلاوية بتوع الكفر كلاتو فرحانين ومزأططين ياما وشمتانين كمان وسمعت يا ابا محمد إن جناب العمدة ضرب تلفون للمركز وطلب سعادة البيه المأمور وقال له يروح يتوسط لبتوع الزمالك عند كبرات الحكومة عشان يرجعوا الأرض أهو راجل ليه كلمة في الحكومة ويمكن يعملوا له خاطر وسمعت إن جناب العمدة كلم سعادة البيه مأمور المركز ييجي ساعة بحالها في التلفون عشان يقول له كمان إن حالة الزملكاوية اللي في الكفر تصعب على الكافر بعد كبرات الحكومة ما كسروا بخاطرهم وخدوا منهم الأرض عيني عينك وسمعت كمان يا ابا محمد إن سعادة البيه مأمور المركز واخد على خاطره ياما من كبرات الحكومة وقال لواحد فيهم إنه مش عارف يودي وشه فين من الزملكاوية اللي في الكفر وقال له كمان إنه مكسوف ييجي الكفر ويقابلهم وياخد بخاطرهم وسمعت كمان ان واحد من كبرات الحكومة قال لبتوع الزمالك اللي كانوا عشمانين فيه يرجع لهم الأرض أنا ماليش فيه دي حاجة ماتخصنيش وماليش دعوة وابعدوا عني وسمعت إن جناب العمدة ناوي يطيب خاطر سعادة البيه المأمور ويعزمه في الدوار وناوي المرادي يدبح قفصين وز وبط وفراخ وحمام بحالهم وناوي كمان يدبح 5 عجول جاموس ويفرقهم على الزملكاوية اللي في الكفر عشان ياخد بخاطرهم ويراضيهم ده غير إنه ناوي كمان يدبح أد 5 عجول جاموس ويخلي أبويا سويلم الغفير الخصوصي بتاع جناب العمدة يفرقهم مع الغفر على ناس الكفر كلاته وزي بعضه يا ابا محمد خلي الناس تأكل لحمة وتتبسط وكل سنة واحنا طيبين.