إبراهيم الديب يكتب : حميدة في الزمالك !

- قول لي يا ولا يا حميدة هم أهلاوية الكفر كلاتو بيقولوا إيه يا ولا بعد اللي شافوه بيحصل في الزمالك اليومين دول وبصحيح يا ولا بيقولوا مفيش فلوس عندهم

 -  والله يابا محمد الدنيا هايصة وزايطة في الكفر كلاتو بعد اللي بيقولوه عن النادي بتاع أبويا الملك فاروق ملك مصر والسودان  وإنه كبرات النادي بيقولوا مفيش فلوس يقبضوا الموظفين ولا فيه فلوس يجيبوا حتى شاي وسكر ولا يجيبوا تومين الشهر اللي فات ولا فيه فلوس يدفعوا المياه والكهربا ولا حق انابيب البوتجاز

وسمعت يا ابا محمد ان كبرات النادي قالوا إنهم هايخصموا فلوس السكن بتاع اللعيبة بتوعهم عشان يوفروا لهم قرشين ينفعوهم في الزنفة اللي هم فيها

وسمعت كمان إنهم عايزين يبيعوا واحد من الغفر اللي بيحرسوا الشبكة بتاعة الجرن اللي بيجروا فيه وسمعت كمان إن فيه واحد من كبرات النادي قال راسي وألف سيف أشوف الزنقة اللي هم فيها ويسكت أبدا وقال حتما ولابد يدفع له كام مليون لحلوح ويسلفهم للنادي عشان يفك الزنفة اللي هم فيها

وسمعت يا ابا محمد إن كبرات النادي زعلانين من بعض ياما ومش طايقين بعض ومفيش حد من كبرات الحكومة راضي يصالحهم على بعض.

وسمعت كمان إن أبويا حسين لبيب الكوماندا بتاعهم زعلان يا ما من زملاته في الدوار الكبير بتاع النادي وحلف تلاتين يمين لازم يغير كام واحد منهم ويحط بدالهم ناس تانية

وسمعت يا ابا محمد إن سعادة البيه مأمور المركز زعلان يا ما من اللي بيحصل في النادي بتاع أبويا الملك فاروق ملك مصر والسودان وقال مايخلصنيش أبدا إن كبرات النادي يزعلوا من بعض ده برضه ده نادي أبويا الملك فاروق ملك مصر والسودان

وسمعت إن جناب العمدة ناوي ياخد بخاطر سعادة البيه مأمور المركز لما عرف إنه زعلان ياما من اللي بيحصل في نادي أبويا الملك فاروق وقال حتما ولابد يعزم سعادة البيه مأمور المركز وياخد بخاطره عشان هو زملكاوي ومايخلصوش يكون زعلان وسمعت إن جناب العمدة ناوي يدبح وز وبط وفراخ وحمام ياما ويعمل عزومة كبيرة لسعادة البيه مأمور المركز وكمان سمعت إن جناب العمدة ناوي يدبح 10 عجول جاموس ويفرقهم على ناس الكفر كلاته بيت بيت لما سعادة البيه مأمور المركز يشرف دوار العمدة وزي بعضه يا أبا محمد خلي الناس تأكل لحمة وتتبسط وكل سنة واحنا طيبين .