إبراهيم الديب يكتب : حميدة وقرار الخطيب

- قول لي يا ولا يا حميدة هم أهلاوية الكفر كلاتو بيقولوا إيه يا ولا بعد أبوك الخطيب ما رجع في كلامه وقال هاينزل الانتخابات .

- والله يابا محمد الدنيا هايصة وزايطة في الكفر كلاتو بعد ما أبويا الخطيب رجع في كلامه وعمل زي الريس جمال زمان وقال إنه مش هايتنحنح وقال راسي وألف سيف لا ممكن أبدا اسيب الناس اللي بحبهم وبيحبوني وقالوا لي اوعى تتنحنح وتسيبنا ده احنا من غيرك ولا نسوى وسمعت كمان يا ابا محمد إن أبويا الخطيب ركب القطر اللي مشوه على شريط السكة الحديد بتاع الكفر ولف بيه أربع سواعي بحالهم وهو باصص من الشباك وبيشاور بايده للاهلاوية بتوع الكفر زي الريس جمال ما كان بيعمل زمان عشان يقولهم إنه لا ممكن يتنحنح أبدا وانه حتما ولابد هايرشح نفسه في الانتخابات عشان مايزعلوش وقال إنه ما يخلصوش زعلهم أبدا وقال كمان إنه راح كشف عند الحكيم بتاع البندر وقال إن الحكيم طمنه وقال له روح بشر الأهلاوية بتوع الكفر كلاتو وقول لهم إنه خلاص مش هايتنحنح وهاينزل الانتخابات وسمعت يا ابا محمد إن كبرات الأهلي قعدوا في الدوار الكبير بتاع النادي وقالوا لازم يعملوا ليلة كبيرة ياما ويعزموا كبرات الأهلاوية في الكفر كلاتو وسمعت كمان يا ابا محمد إن كبرات الأهلي ناويين يعزموا سعادة البيه مأمور المركز وناوين يدبحوا له وز وبط وفراخ وحمام ياما وسمعت كمان يا ابا محمد إنهم ناويبن يعزموا جناب العمدة وابويا مصيلحي شيخ البلد وابويا عبد الهادي شيخ البلد في البر التاني وابويا بسطويسي شيخ الغفر وابويا سويلم الغفير الخصوصي بتاع جناب العمدة 

وسمعت كمان يا ابا محمد إن كبرات الأهلي ناويين يعملوا صوان كبير ياما ويجيبوا مداحين عشان ناس الكفر كلاته يحضروا وسمعت كمان يا ابا محمد إن كبرات الأهلي ناويين يدبحوا عجول جاموس ياما ويفرقوهم على ناس الكفر كلاته بيت بيت وزي بعضه يا أبا محمد خلي الناس تأكل لحمة وتتبسط وكل سنة واحنا طيبين .