إبراهيم الديب يكتب : حميدة والبيه مدحت

- قول لي يا ولا يا حميدة هم أهلاوية الكفر كلاتو بيقولوا إيه بعد الكلام اللي قاله البيه مدحت في التلافزيون عن أبوك الخطيب وتأشيرة بلاد الامريكان وفلوس المدربين الألفرنجة .

- والله يابا محمد الدنيا هايصة وزايطة في الكفر كلاتو بعد الكلام اللي قاله البيه مدحت في القناة بتاعة أبويا تركي الشيخ اللي بيصرف علينا وبيبعزق ريالاته يمين وشمال وسمعت يا ابا محمد إن أهلاوية الكفر كلاتو زعلانين يا ما من البيه مدحت بعد الجرس والفضايح اللي عملها ليلة إمبارح ايشي تاشيرة بلاد الامريكان بتاعة أبويا الخطيب وايشي دورارات المدربين الالفرنجة اللي بعزقوهم كبرات الأهلي عليهم وايشي حاجات ياما قالها البيه مدحت وماكانش يصح يقولها وسمعت كمان إن اهلاوية الكفر كلاتو قالوا لازم يكتبوا بلاغ في البيه مدحت ويودوه المركز لسعادة البيه المأمور طوالي وهو ليه كلمة في الحكومة ويقدر يكلم كبرات المديرية عشان يوقفوه عند حده ويبطل جرس وفضايح وسمعت كمان إن كبرات الأهلي كتبوا بلاغ في البيه مدحت وقدموه عند سعادة البيه وكيل النيابة وقالوا إن البيه مدحت فضحنا وجرسنا في الكفر كلاتو وبقت سيرتنا على كل لسان وبقى كل اللي يسوى واللي مايسواش داير في الكفر يلسن بالكلام ويقول أبويا الخطيب بعزق فلوس النادي يمين وشمال على المدربين الالفرنجة وكمان عملولوا تأشيرة طلعت براني لبلاد الامريكان وانه ما طلعش عيان ولا حاجة ولا راح للحكيم ولا صدق في كلامه ورجع تاني يقول هايخش الانتخابات ومش هايتنحى أبدا وسمعت إن أهلاوية الكفر كلاتو زعلانين ياما من الزملكاوية اللي قعدوا يتريقوا على أبويا الخطيب وراحوا اشتكوا لجناب العمدة وكمان قالوا ضروري يشتكوا لسعادة البيه مأمور المركز وسمعت إن جناب العمدة طيب بخاطرهم وقال لهم مايخلصنيش أبدا اللي حصل من زملكاوية الكفر كلاتو ولا يخلص سعادة البيه مأمور المركز وقال انه ناوي يعمل عزومة كبيرة ياما لكبرات الأهلي عشان ياخد بخاطرهم وسمعت أنه كمان هايعزم سعادة البيه مأمور المركز عشان ياخد هو كمان بخاطرهم وقال انه ناوي يدبح وز وبط وفراخ وحمام ياما ويعمل كام أنجر فتة لكبرات الأهلي وسعادة البيه مأمور المركز وسمعت إن جناب العمدة ناوي كمان يدبح 8 عجول ويفرقهم على ناس الكفر كلاته وطلب من أبويا سويلم الغفير الخصوصي بتاع جناب العمدة يلف على ناس الكفر كلاته بيت بيت ويقولهم إن جناب العمدة هايفرق لحمة عليكم ويبسطكوا 

- وزي بعضه يا أبا محمد خلي الناس تأكل لحمة وتتبسط وكل سنة واحنا طيبين