إبراهيم الديب يكتب : حميدة في إستفتاء الأهلي!!

 - قول لي يا ولا يا حميدة هم أهلاوية الكفر كلاتو بيقولوا إيه بعد الاستفتا اللي عملوه كبرات الأهلي عشان يقولوا لرئيس النادي أوعى تتنحى وتسيبنا بعد العمر ده كله ياولا .

- والله يابا محمد الدنيا هايصة وزايطة في الكفر كلاتو بعدما كبرات الأهلي قعدوا مع بعض وقالوا لا ممكن وراسنا والف سيف رئيس النادي يتنحى بعد السنين دي كلها والعشرة الطويلة وقالوا كمان إن رئيس النادي خيره علينا كلنا وعلى عيالنا ومن غيره حالنا هايقف ولا هاتقوم لنا قومة من تاني وعشان كده سمعت إنهم قعدوا في الدوار الكبير بتاع النادي وقالوا لازم نشوف حل عشان مايصحش رئيس النادي يطلع في التلافزيون ويقول إنه هايتنحى ومش ناوي يدخل الانتخابات تاني وبعدين يرجع في كلامه ويشمت فيهم اللي يسوى واللي مايسواش وقالوا لازم نشوف طريقة عشان الناس ماتكلش وش رئيس النادي وهو بيرجع في كلامه وسمعت يا ابا محمد إن فيه واحد من كبرات النادي قال لهم إحنا ممكن نجيب قطر قديم ونمشيه على شريط السكة الحديد بتاع الكفر ويركبوا فيه رئيس النادي ويمشي بيه في الكفر ويأجروا كام واحد باعلام حمرا ويصفوهم على الطريق زي ما كان الريس عبد الناصر بيعمل زمان لما كان بيركب القطر ويشاور للناس من الشباك وسمعت يا ابا محمد ان كبرات النادي طلبوا من الناس اللي هاتقف على شريط السكة الحديد يزعقوا بحس عالي أول ما يشوفوا القطر هالل عليهم ويشوفوا رئيس النادي بيطل عليهم من الشباك ويقولوا له اوعى تتنحى ده احنا من غيرك ولا نسوى وسمعت كمان إن كبرات النادي جابوا ورقة كبيرة بيقولوا مستوردة وغالية أوي وتمنها ما حدش يقدر عليه وعملوا فيها الاستفتا وكتبوا فيها للناس بتوع النادي حسك عينك انت وهو تقولوا لرئيس النادي سيبنا واتنحى .

وسمعت يا ابا محمد إن زملكاوية الكفر كلاتو بيتمسخروا علي الأهلاوية ونازلين تريقة عليهم والذي منه وسمعت إن جناب العمدة حب ياخد بخاطر الأهلاوية ومايزعلهمش بعد زملكاوية الكفر ما اتمسخروا بيهم وقال لابد إنه يعزم سعادة البيه مأمور المركز عشان ييجي هو كمان ياخد بخاطر الأهلاوية وقال إن سعادة البيه مأمور المركز مايخلصوش أبدا زملكاوية الكفر يتمسخروا بالأهلاوية

 وسمعت إن جناب العمدة ناوي يدبح 10 عجول جاموس ويخلي الغفر يفرقوهم على الكفر كلاتو ده غير عزومة سعادة البيه مأمور المركز اللي بيدبح فيها وز وبط وفراخ وحمام ياما .

وسمعت إن أبويا سويلم الغفير الخصوصي بتاع جناب العمدة هايلف على الكفر كلاتو ويقولهم إن جناب العمدة هايعمل ليلة كبيرة اوي عشان ياخد بخاطر الأهلاوية هو وسعادة البيه مأمور المركز  .

وزي بعضه يا ابا محمد خلي الناس تاكل لحمة وتتبسط وكل سنة واحنا طيبين .