أحمد سليمان: الهجوم على الزمالك غير مبرر.. وجون إدوارد يُحارب من داخل النادي
 (7).jpeg)
في تصريحات إعلامية، فتح أحمد سليمان، عضو مجلس إدارة نادي الزمالك، قلبه للحديث عن أبرز القضايا الساخنة داخل القلعة البيضاء، بداية من أزمة أحمد فتوح، ومرورًا بكواليس فشل عودة أشرف بنشرقي، وحتى محاولات عرقلة المدير الرياضي جون إدوارد.
■ كيف ترى الهجوم الذي تتعرض له بعض الأندية بسبب دعمها للزمالك؟
أشعر باستغراب شديد. هناك أندية مثل البنك الأهلي وبتروجيت تدعم الزمالك وتتعرض للهجوم بسبب ذلك، بينما هناك أندية أخرى تقدم نفس الدعم للأهلي ولا يتحدث أحد. ليه الكيل بمكيالين؟ لازم الناس تسيب التعصب، اللي بيساعد نادي مصري لازم نشكره مش نهاجمه.
■ ما تعليقك على الاتهامات الموجهة لجون إدوارد؟
جون إدوارد بيتحارب من بعض الوكلاء القريبين منه، والمشكلة الأكبر إن في ناس جوا النادي بتساعدهم. وده أمر غير مقبول، إحنا دخلين على موسم جديد، ولازم نساند الجهاز الإداري والفني، عندنا مدير رياضي ورئيس نادي ونائب بيشتغلوا وبيجيبوا لاعيبة محترمة، والواجب علينا نقف في ضهرهم.
■ هل من الممكن أن يُعترض مجلس الإدارة على قرارات المدير الرياضي؟
طبعًا ممكن، لو في قرار ضد مصلحة النادي. بس ده بيتم بالتنسيق مع المشرفين، يعني رئيس النادي ونائبه، والكل بيشتغل لمصلحة الزمالك مش بشكل فردي.
■ وماذا عن أزمة فشل عودة بنشرقي؟
بصراحة، أنا اتهاجمت بسبب الموضوع ده رغم إن ماليش ذنب. بنشرقي مكانش عنده مشكلة يرجع، لكن الزمالك مكانش قادر يوفر الفلوس. وعمرو أدهم وهاني شكري قالوا الكلام ده بعدين. في ماتش القمة اللي انتهى 1-1، واحد من المقربين ليا قالّي "منك لله يا اللي مجبتش بنشرقي"، وبعدها بدقيقتين بنتايك سجل هدف التعادل... ودي كانت رسالة من ربنا.
■ أزمة أحمد فتوح الأخيرة أثارت جدلًا.. ما رأيك فيها؟
أحمد فتوح زار عمه وكان عنده وقت يرجع المعسكر، لكنه راح حفلة في الساحل بعد الزيارة، وده كان تصرف خاطئ. والنادي ما قصرش، وقرر توقيع غرامة مليون جنيه عليه. لازم اللاعيبة تعرف إن اللعب لنادي الزمالك مسؤولية كبيرة، والالتزام شرط أساسي.
■ كلمة أخيرة لجمهور الزمالك؟
أنا بطالب جمهور الزمالك إنه يساند الفريق والإدارة والجهاز الفني. إحنا بنبدأ صفحة جديدة، وعندنا طموحات كبيرة، واللي بيحب الزمالك بجد لازم يسيب الخلافات ويقف مع النادي.
موضوعات ذات صلة
