موسى البطران يكتب : فضيحة بجلاجل .. فى سلة الزمالك !

أصيبت جماهير الزمالك بخيبة أمل شديدة بعد الخسارة أمام الاهلي وبفارق 6 نقاط 77 / 71  في دوري سوبر السلة  لينتزع بذلك الاهلي الصدارة من الزمالك !

والسر في الصدمة التى اصابت جماهير الزمالك أنها كانت تعتقد ان الفوز علي الاهلي اصبح أمرا طبيعيا في ظل تعاقد الزمالك مع المدير الفني الاسباني " اللي حيجيب الديب من ديلة " .. لكن في الآخر طلع  أحمد زي الحاج أحمد !

ومن شاهد منكم المباراة حيقول  : لوكان وائل بدر المدير الفني السابق للزمالك الذى ترك الجمل بما حمل  بسبب ضغوط " السوشيال ميديا  هو اللي وقع في الاخطاء اللي وقع فيها الاسباني  سيجورا صاحب العقد اللي يكلف الزمالك شهريا مليون جنية  .. ايوه مليون جنية  .. لعلق المشانق لوائل بدر !

ولما أتكلم معاكم عن أبرز الأخطاء اللي وقع فيها الاسباني  سيجورا اللي بيتقاضي 16 ألف دولار شهريا غير الفيلا اللي بيقيم فيها .. وهي أخطاء كثيرة وبالجملة اذكر منها خطاء واحد فقط الان .. لما كان الاهلي متقدم علي الزمالك وبفارق 14 نقطة  أجري سيجورا تغيرا بنزول المشد اللي كان موفق ومن خلال عاد الزمالك من جديد للمباراة .. لكن عمنا سيجورا منه لله حب يجود شوية فطلع المشد وركنه علي دكة الاحتياطي  ونسيه خالص وافتكرو في نهاية المبارة  لكن بعد خراب مالطة !

عايز أقولكم أن الاهلي لم يكن في أفضل حالاته خاصة أبرز لاعبيه  مثل أيهاب أمين وزهران وغياب عدد من اللاعبين البارزين زي سرحان .. صحيح رجع للاهلي عمر الجندي بعد غياب من الاصابة  ولكن لم يكن في أفضل حالاته !

اللي "يفرسك " دلوقتي إن زبانية  السوشيال ميديا اللي كانت وراء إستبعاد وائل بدر المدير الفني السابق للزمالك  .. لها راي تاني خالص  في خسارة الزمالك وشايفة ان السبب هو تواضع مستوي اللاعب الاجنبي .. طيب هو مين اللي جاب اللاعب ده .. مش مستر سيجورا هو اللي وافق عليه ؟

للأسف الشديد مجلس إدارة نادي الزمالك والمكلفين بادارة العاب الصالات لهم الدور الاكبر في هذا التخبط والانهيار الذى تشهده العاب الصالات في نادي الزمالك والتى كان لها باع كبير في حصد كل البطولات .. فاكرين الهتاف الشهير : " بجد بجد .. سلة وطايرة ويد " كل دة راح واندثر .. في الوقت اللي ميزانية الالعاب دية  قاربت من ربع مليار جنية والمحصلة  في النهاية  صفر !

وللحديث بقية