موسى البطران يكتب عن : سر فرحة الزمالكاوية بالحصول على نقطة أمام الأهلي!

"أوعى "  تكون فاكر إن فرحة جماهير الزمالك وسر سعادتها علشان التعادل مع الاهلي في مباراة القمة إياها أو"إنهم خدوا" نقطة لاسمح الله .. ياعزيزى سواء كنت أهلاوي او اسماعيلاوي أو إتحادوي  أو حتي زملكاوي .. الموضوع "مش كده خالص " .. يعني أيه ؟

اقولك فوز الزمالك علي الاهلي مش جديد وحصول الزمالك علي بطولات أمر طبيعي .. وزي ما الاهلي فريق كبير .. برضه الزمالك فريق كبير .. الحكاية في الماتش ده مختلفه خالص !

شوف ياعزيزى .. الاهلي دخل الماتش ده وهو عامل "زيطة وزمباليطة  "أه والله .. مهرجانات من اللي قلبك يحبها .. فهم العالم كله إنه النادي اللي لايقهر .. لأنه عمل صفقات جديدة طلع بيها السما .. أيشى  بن شرقي وبن غربي وجراديشار ما شاء الله ..  صفقات خدر  بيها  جمهور الاهلي  وخلاهم يعيشوا في الف ليلة وليه .. "حطوا " في بطونهم كل البطيخ الصيفي !

ما "خبيش " عليكم .. إن توقعات جماهير الاهلي وصلت الي عنان السماء .. بقى "معندهاش" سقف للطموحات .. لو قلت لواحد فيهم إن الاهلي حكسب واحد ولا أتنين بس ..  يزعل منك وممكن ما "يكلمكش " .. "قوم أيه "  كل الاحلام ديه والتوقعات كلها تنزل الارض .. "وأيه اللي بيحصل ده وأيه اللي أنا شايفة ده .. أيه الحلاوه ديه " ؟ عفوا ده مش كلام الاهلاوية .. ده ياعزيزى كلام الزمالكاوية اللي شافت فريقها بيصول ويجول .. بيلعب كرة قدم حقيقية ويسجل هدف التعادل بعد 40 تمريرة  الكرة في أقدام لاعبي الزمالك بيلعبو زي ما همه عايزين !

أكيد أنت دلوقتي عايز تعرف أيه اللي حصل للزمالك ؟ " أوعي " تكون فاكر ان البرتغالية جوزيه بيسيرو  اللي مسك الفريق قبل المباراة كان معاه عصا سحرية ولا جاب معاه لاعبين جدد .. لعيبة الزمالك همه همه ويمكن كمان غايب عنهم عدد كبير من اللاعببين للاصابة والايقاف .. ومش بس كده .. خد عندك مشاكل إدارية ومالية وأنقسامات حادة ..  الحكاية باختصار ياعزيزى .. ان كرة القدم لاتعترف  بالصفقات حتي لو إطلقوا عليها صفقات القرن ولا " بالبروباجندا " اللي عملوها عاشان يكيدوا ببيها جماهير الزمالك .. كرة القدم تعترف فقط بالروح القتالية في الملعب بالاداء الجماعي .. بالتركيز .. وأهم حاجة إحترام المنافس !